• Home
  • Shafin Labarai

Shafin Labarai

Uncategorized

‘Yan sanda sun kama wanda ake zargi da cinikin sassan jiki, sun ceto mutane 4 da aka yi wa dashen koda a Nasarawa

‘Yan sanda sun kama wanda ake zargi da cinikin sassan jiki, sun ceto mutane 4 da aka yi wa dashen koda a Nasarawa

‘Yan Sanda
Daga Isaac Ukpoju
Lafia, Nuwamba 19, 2025 (NAN) Rundunar ‘yan sandan jihar Nasarawa ta kama wani mutum da ake zargi da hannu a cikin cinikin sassan jikin bil’adama, sannan ta ceto mutane huɗu da ake zargi an cirewa sassan jiki a Lafia.

Kwamishinan ‘yan sanda, Shettima Muhammad, ya bayyana hakan yayin da yake yi wa manema labarai jawabi a ranar a Lafia.

Ya ce an kama wanda ake zargin a ranar Litinin a wurin ajiye motoci na Alhaji Yahaya Sabo, Bukan Sidi Lafia, bayan da jami’an wurin ajiye motoci suka yi ƙara.

Ya ce jami’an ‘yan sanda na yankin ‘B’ sun yi gaggawar zuwa wurin da aka miƙa wanda ake zargin, wanda aka sani da Maro Ebojoh, mai shekaru 40, daga Etiope East LGA na Delta, a hannunsu.

A cewar kwamishinan, binciken farko ya nuna cewa Ebojoh ya isa Lafia don ɗaukar masu ba da gudummawar sassan halittar jiki don a yi musu dashen koda nan take.

Muhammed ya ce wanda ake zargin ya jawo hankalin waɗanda abin ya shafa da alƙawarin Naira miliyan biyu kowannensu.

Ya bayyana wadanda abin ya shafa a matsayin: Umar Barau, mai shekaru 25, Suleiman Alhaji-Garba, mai shekaru 20, Williams Dadung, mai shekaru 32, da Stanley Ezekiel, mai shekaru 27.

Kwamishinan ya ce wanda ake zargin ya kai wadanda abin ya shafa asibiti don duba lafiyarsu kuma daga busani a dauke wadanda su ka ci jarrabawar zuwa Abuja don dashen, amma an dakatar da aikin saboda damuwar hawan jini.

“Jami’an rundunar sun yi gaggawar komawa Abuja suka ceto wanda abin ya shafa ba tare da wata matsala ba daga wani otal da aka kwantar da shi,” in ji shi.

Muhammad ya ce wanda ake zargin ya amsa laifin, ya kara da cewa ya amince ya karbi Naira miliyan 6.5 daga abokin cinikinsa, wanda daga ciki ya riga ya karbi Naira 500,000.

“Ya kuma amsa cewa ya sayi mai bayar da gudummawa ga wani abokin ciniki watanni biyu da suka gabata, wanda ya karbi Naira miliyan 1, yayin da aka biya mai bayar da gudummawar Naira miliyan 2.5,” in ji Muhammad.

Kwamishinan ya ce ana ci gaba da bincike don kamawa da gurfanar da sauran membobin kungiyar masu cire sassan jikin da suka gudu.

A wani ci gaba makamancin haka, Muhammad ya kuma sanar da kama mutane tara da ake zargi da hannu a jerin hare-haren fashi da makami da kuma kisan ɗan wani jami’in ‘yan sanda a karamar hukumar Karu ta jihar.

Ya ce jami’an tsaro da ke aiki a Sashen ‘A’ na Mararaba sun kai samame a wani maboyar masu laifi a ranar 4 ga Nuwamba a titin Musbawu, Mararaba, wanda ya kai ga kama mutane tara, masu shekaru tsakanin 18 zuwa 29.

Muhammad ya ce bincike ya nuna cewa wadanda ake zargin sun aikata fashi da makami da dama da suka shafi da daddare a Mararaba da al’ummomin da ke makwabtaka da ita, suna satar wayoyin hannu, suna canja wurin kuɗi daga asusun bankin wadanda abin ya shafa, da kuma sayar da na’urorin da aka sace.

“Wadanda ake zargin sun amsa laifin kai hari da kuma kashe ɗan wani jami’in ‘yan sanda da ke aiki a lokacin wani fashi a Uke a ranar 20 ga Mayu,” in ji shi.

Kwamishinan ‘yan sanda ya kara da cewa an mika lamarin ga Sashen Binciken Laifuka na Jiha (SCID), Lafia, kuma za a gurfanar da wadanda ake zargin a gaban kotu bayan kammala bincike.

Ya bukaci mazauna yankin da su kasance cikin taka tsantsan, musamman kan mutanen da ke nuna kansu a matsayin wakilan masu bayar da gudummawar gabobin jiki.

“Ka faɗi wani abu idan ka ga wani abu,” Muhammad ya yi kira. (NAN)(www.nannews.ng)

IU/BRM
=======
Bashir Rabe Mani ne ya gyara shi

Uncategorized

Rikici ya barke yayin da Minista Wike da Gwamna Bala suka yi arangama a Sakatariyar PDP ta kasa

Rikici ya barke yayin da Minista Wike da Gwamna Bala suka yi arangama a Sakatariyar PDP ta kasa

Rikici
Daga Emmanuel Oloniruha
Abuja, Nuwamba 19, 2025 (NAN) Rikici ya barke a sakatariyar jam’iyyar Peoples Democratic Party (PDP) ta kasa a ranar Talata, yayin da Kwamitin Aiki na Kasa (NWC) wanda Taminu Turaki ke jagoranta da kuma na Shugaban riko na kasa na jam’iyyar, Abdulrahman Mohammed, suka yi arangama.

Kamfanin Dillancin Labarai na Najeriya (NAN) ya ruwaito cewa shugaban riko na jam’iyyar, Mohammed yana samun goyon bayan Ministan Babban Birnin Tarayya, Nyesom Wike.

NAN ta kuma ruwaito cewa lamarin ya ragu lokacin da Gwamna Bala Mohammed na jihar Bauchi, Shugaban Kungiyar Gwamnonin PDP, da Seyi Makinde na Oyo suka isa sakatariyar jam’iyyar.

Mohammed da Makinde sun isa sakatariyar jam’iyyar da misalin karfe 10:45 na safe, amma manyan ƙofofin sakatariyar an kulle su, wanda hakan ya sa suka shiga harabar jam’iyyar, suka bar motocinsu a baya.

Daga baya Wike ya isa sakatariyar jam’iyyar da misalin karfe 11:15 na safe, kuma motocin gwamnoni sun tare shi a gaban sakatariyar jam’iyyar suna ƙoƙarin shiga harabar.

Duk da haka, ministan ya sami damar shiga harabar lokacin da jami’an tsaro suka fara harba hayaki mai sa hawaye don tarwatsa membobin jam’iyyar da sauran su, ciki har da ‘yan jarida, da kuma ‘yan daba na siyasa da suka riga suka shiga sakatariyar.

Ishiaku Sharu, Mataimakin Kwamishinan ‘Yan Sanda (Ayyuka), kwamandan FCT, ya zo ya umarci Gwamna Mohammed da ƙungiyarsa da su bar harabar sakatariyar jam’iyyar.

Duk da haka, Mohammed ya ce za su tafi ne kawai idan Wike da duk wani mutum ya tafi, amma ya koma cikin zauren NWC lokacin da aka gaya musu cewa ana ci gaba da taro a zauren.

Gwamnonin da sauran mutane suna cikin harabar jam’iyyar, yayin da Wike bai fito daga motarsa ​​da aka ajiye a gaban ginin ba.

NAN ta ruwaito cewa bangaren da Bala ke jagoranta na PDP a ranar Asabar a Ibadan sun kori Wike da wasu daga cikin jam’iyyar.(NAN)(wwww.nannews.ng)

OBE/DCO
========
Deborah Coker ce ta gyara

Ilimi

NELFUND za ta fadada lamuni zuwa ga dalibai masu horon sana’o’i

 

Lamuni

By Funmilayo Adeyemi

Abuja, Nuwamba 18, 2025 (NAN) Asusun bada lamunu na ilimin Najeriya (NELFUND), ya sanar da shirin tsawaita shirin ba da lamuni na dalibai don shirye shiryen koyon sana’o’i.

Manajan Darakta na NELFUND, Akintunde Sawyerr ne ya bayyana hakan a wata hira da kamfanin dillancin labarai na Najeriya (NAN) a Abuja.

Sawyerr ya ce tsarin fadadawar ya yi dai-dai da shirin gwamnatin tarayya na bunkasa ilimi da fasaha.

Ya kara da cewa matakin ya nuna yadda shugaban kasa Bola Tinubu, ya kuduri aniyar samar da ci gaban jarin masu sana’o’i fiye da ilimin jami’a na gargajiya.

“Babu wata al’umma da masana suka gina su kadai.

“Yana da matukar muhimmanci a sami mutanen da za su iya amfani da hannayensu, a kara masu kuzari, ƙarfafa su, da basira don aiwatar da dabaru masu wayo da ke fitowa daga waɗanda ke fitowa daga cibiyoyin ilimi,” in ji shi.

Sawyerr ya bayyana cewa, yayin da NELFUND ta fi mayar da hankali kan bayar da tallafin kudi ga dalibai a manyan makarantu tun lokacin da aka kaddamar da shi, aka fara shirye-shiryen fadada shi ga masu sana’a da fasaha a fadin kasar.

A cewarsa, mataki na gaba na ci gaban Najeriya yana bukatar daidaito tsakanin kwarewar ilimi da fasaha.

“A NELFUND, muna da hurumin yin sana’o’i.

“Ba mu fara ba tukuna, amma na san cewa gwamnatin shugaban kasa Bola Tinubu ta tabbatar da cewa an samu cikakken bayani kan batun.

” Ma’aikatar ci gaban matasa tana yin sana’o’i, ma’aikatar Ilimi ta shiga sana’o’i da kuma ma’aikatar tattalin arziki ta dijital ta shiga cikin dabarun IT.

“Don haka, fasaha wani abu ne da aka sa ma’aikatun gwamnati da yawa da aikatawa.

“Kuma ina ganin a fili yake cewa injiniyan da zai iya yin gini, ya fi injiniyan da zai iya zane kawai.

“Matakin da muke a kasar nan a yanzu, shine abin da zan kira, tsarawa, ginawa, da sarrafa matakin,” in ji shi.

(NAN)( www.nannews.ng )

FAK/ROT

=======

Rotimi Ijikanmi ne ya gyara shi

Aisha Ahmed ta fassara shi.

Uncategorized

Sace daliban makarantar Kebbi: Shugaban Soji ya umarci sojoji su ƙara himma wajen ceto ‘yan matan

Sace daliban makarantar Kebbi: Shugaban Soji ya umarci sojoji su ƙara himma wajen ceto ‘yan matan

Sace daliban

Daga Sumaila Ogbaje
Abuja, Nuwamba 18, 2025 (NAN) Babban Hafsan Sojan Kasa (COAS), Laftanar Janar Waidi Shaibu, ya umurci sojojin Operation FANSAN YANMA da su ƙara himma wajen tabbatar da an sako daliban da aka sace daga makaranta a Kebbi.

Kamfanin Dillancin Labarai na Najeriya (NAN) yayi tuni cewa waɗanda ake zargi ‘yan fashi ne suka sace ɗalibai 25 a ranar Litinin daga Makarantar Sakandare ta ‘Yan Mata ta Gwamnati (GGCSS) Maga, a ƙaramar Hukumar Danko/Wasagu.

‘Yan bindigar sun kuma kashe mataimakin shugaban makarantar a lokacin harin.

Jami’in Yaɗa Labarai na Operation FANSAN YAMMA, Kyaftin David Adewusi, a cikin wata sanarwa a ranar Talata, ya ce COAS ya ba da umarnin ne a lokacin da take rangadin aiki a jihar a ranar Litinin.

Da yake jawabi ga kwamandojin sojoji, Shaibu ya umarce su da su gudanar da ayyukan leƙen asiri da kuma ci gaba da bin diddigin waɗanda suka sace yaran dare da rana.

Ya ce “dole ne mu nemo waɗannan yaran. Ku yi aiki da hankali da ƙwarewa bisa dukkan hankali. Nasara ba zaɓi ba ce.”

COAS ya kuma yi kira da amfani da ƙungiyoyin sa ido na gida da mafarauta, inda ya bayyana su a matsayin abokan hulɗa masu mahimmanci a cikin aikin.

Ya roƙe su da su yi amfani da iliminsu game da yankin tare da haɗin gwiwar sojoji don gano da kuma kawar da masu laifi.

“Tare, za mu dawo da zaman lafiya tare kuma mu tabbatar da cewa yara za su iya zuwa makaranta lafiya,” in ji shi.

A lokacin ziyarar ta’aziyya ga Sarkin Gargajiya na Danko, Alhaji Abubakar Allaje, da Shugaban GGCSS Maga, Hajiya Rabi Magaji, COAS ta tabbatar musu da jajircewar sojoji na ceto ɗaliban da aka sace ba tare da wata matsala ba.

Ya umurci sojoji da su kasance masu juriya da ƙwarewa, yana mai roƙonsu da su yi aiki bisa ƙa’idodin aiki yayin da suke ci gaba da amsawa, da ladabi, da kuma jajircewa wajen dawo da zaman lafiya a Jihar Kebbi da kewaye. (NAN)(www.nannews.ng)
OYS/HA
========
Hadiza Mohammed-Aliyu ce ta gyara

Uncategorized

Tinubu yayi kira ga Super Eagles su mayar da hankali kan samun nasara a kofin Africa 

Eagles
Daga Muhyideen Jimoh
Abuja, 18 ga Nuwamba, 2025 (NAN) Shugaba Bola Tinubu ya yi yabo ga kungiyar kwallon kafa ta Super Eagles bisa kokarinsu a wasan cancantar gasar cin kofin kwallon kafa na duniya a 2026 ya bukace su su mayar da hankali kan samun nasara cin kofin Africa.

Tinubu ya ce duk da rashin nasara da aka sha ranar Lahadi a hannun Jamhuriyar Dimokuradiyyar
Congo a Maroko, ‘yanwasan sun cancanci yabo.

Mai magana da yawun shugaban kasa, Mista Bayo Onanuga, ya bayyana haka a wata sanarwa da aka fitar a Abuja.

Tinubu ya yi kira ga tawagar da su watsar da rashin nasarar da suka fuskanta kuma su mayar da hankali kan shirin tunkarar gasar cin kofin nahiyar Afrika (AFCON) ta 2025 da aka tsara daga Disamba 2025 zuwa Janairu 2026 a Maroko.

Kamfanin Dillancin Labarai na Najeriya (NAN) ya ruwaito cewa an fitar da Eagles daga gasar cancantar bayan wasan da ya kare 1-1 a lokacin karin lokaci, wanda aka biyo baya da rashin nasara ta 4-3 a jarrabawar buhu daga kai sai hola a hannun DR Congo.

Ya ce hakan ya zama karo na biyu da Najeriya ta kasa samun cancantar shiga gasar cin kofin duniya a jere.

Shugaban kasa ya ce duk da cewa rashin nasarar ya yi raɗadi, tawagar ta cancanci yabo bisa jajircewarsu, musamman bayan cin nasara a wasan farko na share fage da suka yi da Gabon.

Ya kara da cewa “duk da rashin sa’a da muka yi, dole ne mu yaba wa ‘yan wasa saboda kokarinsu kuma mu ci gaba da tallafa musu.

“Yanzu dole ne mu rufe dukkan gibi. masu kula da kwallon kafa, ‘yan wasa da duk wadanda abin ya shafa dole ne su koma kan tsarin aiki.

“Yanzu lokaci ne da za mu mayar da dukkan kokarinmu kan kofin kasashen Afirka. Dole ne Super Eagles su dawo da darajar da aka rasa.”

NAN ta ruwaito cewa Super Eagles sun kuskura su ci nasara a wasan karshe na AFCON, inda suka sha kashi 2-1 daga kungiyar Côte d’Ivoire a cikin gasa mai tsanani da ta bar Najeriya da kyautar azurfa bayan fafatawa mai wahala. (NAN)(www.nannews.ng)
MUYI/HA
=========
Hadiza Mohammed-Aliyu ce ta gyara

Shari'a

Nnamdi Kanu ya kori kungiyar lauyoyi masu kare shi, ya kalubalanci hurumin kotu

 

By Taiye Agbaje

Abuja, Oktoba 23, 2025 (NAN) Nnamdi Kanu, shugaban masu fafutukar kafa kasar Biafra (IPOB), a ranar Alhamis, ya bayyana korar tawagar lauyoyinsa, karkashin jagorancin Cif Kanu Again, SAN, a babbar kotun tarayya dake Abuja.

Kanu, ya shaida wa mai shari’a James Omotosho, a zaman da aka ci gaba da zaman, cewa a shirye yake ya kare kansa.

Biyo bayan matakin da shugaban kungiyar ta IPOB ya dauka, dukkan manyan masu fafutuka a cikin kungiyar da suka hada da Cif Agabi, tsohon babban lauyan gwamnatin tarayya (AGF), sun janye daga ci gaba da fitowarsu a shari’ar.

Dangane da wannan al’amari, Kanu, wanda a yake gabatar da jawabi a gaban kotun, ya kalubalanci hurumin kotun da ta gurfanar da shi.

Kamfanin dillancin labarai na Najeriya (NAN), ya ruwaito cewa Kanu ya sanya hannu a kan korafinsa kuma ya shigar da shi a ranar 21 ga watan Oktoba.

Ya kuma sanya tsohon babban lauyan gwamnatin tarayya, Abubakar Malami da sauran su, a matsayin shaidu a ci gaba da shari’ar da ake yi na zargin ta’addanci, kuma ya jera manyan mutane da dama a matsayin shaidu.

Daga cikin wadanda Kanu ya lissafa a matsayin “shaidu masu karfi” akwai Ministan babban birnin tarayya, Nyesom Wike; tsohon ministan tsaro, Janar Theophilus Danjuma mai ritaya da kuma tsohon babban hafsan sojin kasa, Janar Tukur Buratai mai ritaya.

Sauran sun hada da, Gwamna Babajide Sanwo-Olu na jihar Legas, Gwamna Hope Uzodinma na Imo, ministan ayyuka, Dave Umahi, tsohon Gwamnan Abia, Okezie Ikpeazu, da tsohon Darakta-Janar, Hukumar Leken Asiri ta (NIA), Ahmed Abubakar.

Sauran sun hada da tsohon shugaban hukumar tsaro ta farin kaya, Yusuf Bichi, da kuma shaidu da dama da bai bayyana sunayensu ba.

Kanu, a cikin karar, ya yi alkawarin gabatar da bayanan rantsuwar dukkan shaidun, na son rai ga wannan kotu mai girma, kuma za su sanar da masu gabatar da kara a lokacin da ya  dace.

Hakazalika, NAN ta ruwaito cewa shugaban na IPOB ya yi ganawar sirri da tawagar lauyoyin sa a babbar kotun kasa a Abuja ranar Laraba.

Kanu wanda jami’an hukumar tsaro na farin kaya (DSS) suka gabatar da shi a kotu, ya gana da ‘yan kungiyar llauyoyin nasa a kotun mai shari’a James Omotosho, kamar yadda aka umarta a baya.(NAN)(www.nannews.ng)

TOA/SH

Fassarar Aisha Ahmed 

=====

 

Lafiya

Shugabar wata karamar hukuma a Legas ta haramta cinikin gefen hanya

Gefen hanya

Daga Idris Olukoya

Epe (Lagos), Oktoba 23, 2025 (NAN) Shugabar karamar hukumar Epe ta jihar Legas, Ms. Surah Animashahun, ta yi gargadi da a daina yin ciniki a gefen titi a yankin, saboda hadurran da ke tattare hakan da kuma cunkoson ababen hawa.

Animashahun, ta shaidawa Kamfanin Dillancin Labarai na Najeriya (NAN) a ranar Alhamis cewa, matakin ya zama dole domin inganta zirga-zirgar ababen hawa, da inganta lafiyar jama’a, da kuma maido da tsari a wuraren da jama’a ke cunkoso.

Ta ce, an kai samame ne a kan muhimman wurare kamar; Kasuwar Aiyetoro, Tsohon Garage Ijebu-Ode, Ita-Opo, Kasuwar Inuwa da sauran wuraren da aka gano a cikin al’umma.

“Yan kasuwa a wadannan yankuna sun samu koma bayan tsarin hanya da kuma hanyoyin tafiya, domin hakan  na haifar da hadari mai tsanani.

“Daga yanzu, majalisar ba za ta amince da yin cinikin gefen hanya ba, saboda hadurra da cunkoson ababen hawa,” in ji ta.

Shugaban ya ce jami’an kungiyar yaki da rashin da’a ta Kick Against Indiscipline (KAI), za su zagaya domin gudanar da ayyukan dakile cin hanci da rashawa da ake yi a kan tituna a fadin al’umma.

Animashahun, ta kuma bayyana cewa, an samu hadurra da dama a kan titin Aiyetoro, wanda ya yi sanadin asarar rayuka da dukiyoyi sakamakon tukin ganganci.

“Ba za mu iya ci gaba da jure asarar rayuka da dukiyoyi ba sakamakon rashin da’a daga mutanenmu, saboda hanyoyin mota ne, ba na kasuwanci ba,” in ji ta.

Ta bayyana cewa, karamar hukumar ta samar da wurin da ya dace a bayan kasuwar Aiyetoro domin ‘yan kasuwa su gudanar da harkokinsu lafiya ba tare da hana zirga-zirga ba.

“Mun yi isassun shirye-shirye domin ‘yan kasuwarmu su yi cinikinsu a bayan kasuwa, inda masu ababen hawa ba sa wucewa, a hukumance an kebe wurin domin yin ciniki,” inji ta.

Shugaban karamar hukumar, ta bada tabbacin cewa ana ci gaba da kokarin sake gina kasuwar Aiyetoro, wadda ta ruguje a zamanin gwamnatin tsohon gwamna Akinwunmi Ambode.

Ta kara da cewa, nan ba da dadewa ba, za a sake gina kasuwar a karkashin jagorancin Gwamna Babajide Sanwo-Olu, inda ta cigaba da cewa, tattaunawa da tsare-tsare sun yi nisa.

NAN ta ruwaito cewa, ‘yan kasuwa a wuraren da abin ya shafa kamar, Aiyetoro, Ita-Opo, Shade, Popo Oba, da Papa, an umurce su da su koma kasuwannin da gwamnati ta amince da su.

Karamar hukumar ta kara yi gargadin cewa, duk dan kasuwan da ya karya dokar zai fuskanci takunkumi a atisayen aiwatar dokar a gaba.

Animashahun ta cigaba da cewa ba wai an yi wannan shiri ne don farautar kowa ba, sai don tabbatar da tsari, da’a da kuma tsaron mazauna yankin.

Ta yi kira ga shugabannin kasuwar, da shugabannin al’umma da su wayar da kan ‘ya’yansu akan muhimmancin bin doka da oda, inda ta jaddada cewa gyare-gyaren harkokin gudanar da birane za su ci gaba da samun fifiko a karkashin gwamnatinta. (NAN)(www.nannews.ng).

 

SIO/KOLE/CHOM

========

 

Remi Koleoso/Chioma Ugboma ne ya gyara shi

Aisha Ahmed ta fassara

Al'umma

Wata gidauniya ta zaburar da sarakuna domin yaki da cin zarafin mata a Bauchi

Daga Amina Ahmed

Ningi (Bauchi srate), Oktoba 23, 2025 (NAN) Wata kungiya mai zaman kanta, Ikra Foundation for Women and Youth Development (IKFWYD), ta fara wani shiri na shekaru biyu, don zaburar da maza wajen magance cin zarafi.(GBV).

Kamfanin Dillancin Labarai na Najeriya ya ruwaito cewa ana aiwatar da shirin ne a kananan hukumomin Bauchi, Ningi, da Toro.

Jami’in sa ido da tantancewa na gidauniyar, Isma’il Umar ne ya bayyana hakan a wani taron bayar da shawarwari da aka gudanar da hakiman kananan hukumomi a garin Ningi.

Ya ce rawar da cibiyoyin gargajiya ke takawa na yin tasiri mai kyau wajen canza halayya tare da hana wuce gona da iri ba.

“An tsara shirin ne domin jawo hankalin maza, kan batutuwan da suka shafi kare hakkin mata da ‘ya’ya mata baki daya.

“Ba za a iya samun jin daɗin iyali da haɗin kai ba, ba tare da sa hannun maza ba,” in ji shi.

Umar ya lura cewa, kalubale kamar rashin fahimtar juna ta jinsi, rashin fahimtar juna a cikin gida, rashin fahimtar juna a tsakanin ma’aurata, da karancin sanin nauyin da ya rataya a wuyansu na haifar da rashin zaman lafiya a iyali.

“In aka mayar da hankali ga maza a matsayin abokan haɗin gwiwa don inganta zaman lafiya da walwala, wannan shirin yana da nufin ƙarfafa tasirin su a cikin iyalai da al’ummomi,” in ji shi.

Umar ya kara da cewa, shirin zai samar da hadin kai tsakanin maza da mata, wajen wanzar da zaman lafiya a gidajen aure.

Shi ma da yake jawabi, Mista Bamidele Jacobs, Daraktan Shari’a na Lauyoyin Alert, ya ce Lauyoyin ALert da Iqra Foundation, za su aiwatar da shirin na tsawon shekaru biyu.

A cewarsa, maza na da matukar muhimmanci wajen dakile barazanar GBV, ya kara da cewa za a zabi zakarun maza don gudanar da shirin.

A nasu jawabai mabambanta, sarakunan gargajiya sun bayyana goyon bayansu da jajircewarsu ga shirin.

Hakimin Ningi, Alhaji Yusuf Danyaya, ya yi alkawarin zaburar da maza domin gudanar da wannan shiri, inda ya ce “gidan da babu tashin hankali yana haifar da zaman lafiya a cikin al’umma.”

Hakazalika, Hakimin Miri da ke cikin birnin Bauchi, Alhaji Hussaini Uthman, ya ce manufar shirin ta yi daidai da irin rawar da shugabannin al’umma ke takawa wajen samar da sulhu a tsakanin ma’aurata.

A nasa bangaren, Hakimin Toro, Alhaji Umar Adamu, ya ce, yin jawabi akan GBV, wani nauyi ne da ya rataya a wuyansu domin tabbatar da cewa al’umma sun kasance cikin aminci da lumana. (NAN) (www.nannews.ng)

 

AE/BEKl/KLM

iEdited by Abdulfatai Beki/Muhammad Lawal

Fassarar Aisha Ahmed 

 

Uncategorized

Gwamnatin Tarayya ta jajantawa Gwamna Bago, al’ummar Nijar bisa fashewar tankar mai

Ta’aziyya

By Collins Yakubu-Hammer

Abuja, Oktoba 23, 2025 (NAN) Gwamnatin tarayya ta jajanta wa gwamnati da al’ummar Neja bisa fashewar wata tankar man fetur a garin Essa, da ke karamar hukumar Katcha a jihar.

Hakan na kunshe ne cikin wata sanarwa da ministan yada labarai da wayar da kan jama’a na kasa, Alhaji Mohammed Idris, ya fitar ranar Alhamis a Abuja

Takardar ta bayyana matukar alhininsa bisa afkuwar lamarin da yayi sanadin salwantar rayuka da kuma jikkata wasu da dama.

“Muna tare da gwamnati da al’ummar jihar Neja wajen jimamin wannan rashi.

“Wannan lamari mai ratsa zuciya, ya sake haifar da mummunar illar hadurran tankar mai a cikin al’ummarmu.

“Gwamnatin tarayya, ta yi bakin cikin cewa, duk da cigaba da wayar da kan jama’a tare da gargadi game da illolin kwasar man fetur daga fadowar tankunan man fetur, har yanzu wasu na yin kasadar da ke barazana ga rayuwa.

“Kowane ran dan Najeriya yana da daraja, kuma irin wadannan bala’o’in za a iya kauce musu sun zama izina domin ƙarin kulawa da bin umarnin tsaro,” in ji Idris.

Ya yaba da yadda gwamnatin Neja, hukumomin tsaro da masu bada agajin gaggawa, suka gaggauta daukar matakin kashe gobarar, tare da ceto wadanda suka tsira da rayukansu, kuma suka bayar da tallafi ga iyalan wadanda abin ya shafa.

Ministan ya ce an kuma umurci Hukumar bayar da agajin gaggawa ta kasa (NEMA), da ta kara kaimi akan kokarin da gwamnatin jihar ke yi na samar da agaji da magunguna ga wadanda abin ya shafa da iyalansu.

“Gwamnatin tarayyar ta kuma umurci hukumar wayar da kan jama’a ta kasa, da ta kara kaimi wajen wayar da kan jama’a a fadin kasar.

“A kara tsaurara matakan tsaro, musamman a yankunan karkara da masu fama hadariurra, domin hana sake afkuwar irin wannan bala’i.

“Tunaninmu da addu’o’inmu suna tare da wadanda abin ya shafa tare da iyalansu, da daukacin al’ummar Neja a wannan lokaci na bakin ciki.

“Allah Ya jikan wadanda suka rasu, kuma Allah Ya bawa ‘yan’uwansu ikon jure wannan rashi mai raɗaɗi,” in ji Idris. (NAN) (www.nannews.ng)

 

CMY/BEKl/BRM

==============

Edited by Abdulfatai Beki/Bashir Rabe Mani

Fassarar Aisha Ahmed

 

Shari'a

Wata mata ta nemi kotu ta raba aurenta saboda rashin soyayya

Soyayya

By: Mujidat Oyewole

Ilorin, Oct. 23, 2025 (NAN) Wata mata mai suna Misis Hajara Busari, ta roki wata kotu da ke garin Ilorin, da ta raba aurenta da mijinta, Mista Mumini Anafi, shekaru shida da suka gabata, saboda rashin soyayya.

Mai shigar da kara ta shaida wa kotun a ranar Alhamis cewa, ita ba ta da sha’awar auren na bisa addinin Musulunci da mijinta, kuma ta bukaci kotun da ta raba su.

Tace tana neman umarnin a raba aure, kuma a bata hakkin kula da ‘ya’yanta uku, da kuma kudi N50,000, a matsayin kudin kula da ‘ya’yanta.

A halin da ake ciki, mijin da ake kara, ya shaida wa kotun cewa har yanzu yana sha’awar zaman aure da matarsa, kuma ya bukaci kotun da kada ta yi sassauci akan abunda mai shigar da kara ya nema.

Alkalin kotun, Mista Toyin Aluko, ya bukaci maigidan da ya binciko duk wata dama da zai samu, domin samun sulhu cikin lumana kan duk wata takaddama da matarsa.

Kotun ta dage ci gaba da sauraron karar har zuwa ranar 17 ga watan Disamba, domin samun rahoton sasantawa ko kuma sauraron karar. (NAN)www.nannews.ng

 

MOB/UNS

======

 

Sandra Umeh ta gyara

Aisha Ahmed ta Fassara