Shettima ya bayyana samuwar zuba jarin dala biliyan 4.8 a fannin kiwon lafiya

Da yake jawabi a wurin kaddamar da asibitocin Sahad da ke 
Abuja ranar Asabar, Shettima ya bayyana wata dabarar da gwamnatin ta fitar kuma za ta 
bi don magance kalubalen da suka dade da kuma ciyar da tsarin 
kiwon lafiyar Najeriya gaba.

Ya kuma jaddada bukatar samun hadin kai a bangaren kiwon lafiya, 
inda ya ce, “bangaren kiwon lafiyar mu na bukatar hada kai. 
Irin wannan rana itace wadda ba za mu iya kau da kai ba don muhimmancin ta."

Shettima ya bayyana kudirin gwamnati na farfado da tsarin kiwon 
lafiya, tare da yin gyare-gyare kan taswirar hanyar kiyon lafiya mai karfi 
da a ka tsara don magance matsalolin da suka hana ci gaba.

Mataimakin shugaban kasar ya amince da kalubale a bangaren 
kiwon lafiya, wadanda suka hada da hauhawar farashin magunguna, 
daukar dogon lokacin jira na asibiti, da karancin ma’aikatan lafiya.

Ya jaddada mahimmancin shigar da kamfanoni masu zaman kansu 
don inganta damar samun ingantaccen lafiya.

Shettima ya yabawa shugaban/wanda ya kafa kamfanin Sahad Group 
of Companies, Alhaji Ibrahim Mijinyawa, bisa gudummawar da yake 
bayarwa a fannin kiwon lafiya da kuma jajircewarsa na 
taimamon rayukan al'umma ta hanyar sana’ar sa.

Karamin ministan lafiya da walwalar jama’a, Dr Tunji Alausa, ya 
bayyana asibitin a matsayin wani sabon babi na kiwon lafiya a 
Najeriya.

Ya kara da cewa kafa asibitin wani hangen nesa ne wanda ke 
misalta abin da za a iya samu idan mutane masu kishin jama’a 
suka zuba jari a lafiyar ‘yan kasarsu.

Mataimakin Shugaban Asibitin Sahad, Dokta Shamsuddeen Aliyu, 
ya bayyana asibitin a matsayin wani gini na zamani wanda ke 
nuna jajircewarsu na samar da ingantaccen kiwon lafiya.

A cewarsa, asibitin na nuni da hangen nesa don samun 
kyakkyawar makoma inda kowa zai samu cikakkiyar kulawa.

Ya bayyana cewa Asibitin Sahad yana da gadaje 200 mai 
dauke da dakunan tiyata guda bakwai, da injinan wankin koda
guda 13, da kuma rukunin ko ta kwana na ICU masu gadaje 10.(NAN)(www.nannews.ng)

SSI/AMM/HA
===========
Abiemwense Moru da Hadiza Mohammed-Aliyu ne suka gyara